“BUNA: Isiltasun osteko ahotsak” erakusketa Eibarren

BUNA – Erakusketari buruz

2020ko azarotik, Etiopiako iparraldeko Tigray eskualdea XXI. mendeko gerra odoltsuen eta isilduenetako baten eszenatoki bihurtu da. 600.000 pertsona baino gehiago hil dituzte, eta 120.000 emakume eta neskato inguruk sexu-indarkeria sistematikoa pairatu dute, gizateriaren aurkako krimenen testuinguruan. Blokeo militarrak, lehorteak eta goseteak areagotu duten krisi humanitario hau ia erabat kanpoan geratu da arreta mediatikotik.

Egoera horren aurrean, Egoaizia GGKE eibartarra izan da lehenetarikoa eskualdean laguntza humanitarioa ematen. Hasieratik, tokiko erakundeekin lankidetzan aritu da, elikagaiak, haziak, abereak eta tresna agronomikoak banatuz, baita laguntza psikosoziala ere, batez ere sexu-indarkeriaren biktima izan diren emakumeekin. “Buna” izeneko tokiko kafearen errituala espazio terapeutiko bilakatu da, emakumeek beren mina partekatu, loturak berreraiki eta kolektiboki sendatzeko aukera izan dezaten.

Erakusketak 30 argazki jasotzen ditu, euskaraz eta gazteleraz idatzitako testuekin lagunduta. Irudiak Ximena Borrazás, Edgar Gutiérrez eta Iñaki Luis fotokazetariek egin dituzte; guztiak gatazka, migrazio eta gatazken osteko testuinguruetan esperientzia handiko profesionalak dira. Haien lanak National Geographic, The Guardian, Le Monde, BBC edo El País bezalako komunikabideetan argitaratu dira, eta euren begirada konprometituak testuinguruaren gogortasuna zein protagonista diren emakumeen duintasuna erakusten ditu.

Erakusketa osatzeko, LuzNorte Films-ek ekoitzitako 18 minutuko film laburra proiektatuko da, non sexu-indarkeriatik bizirik atera diren emakume tigrinyarren testigantzak jasotzen diren, eta kafearen inguruan elkartzeak nola bihurtu den sendatzeko, komunitatea berreraikitzeko eta traumatismoari aurre egiteko tresna kolektibo bat.